Feestyd finansies: Terugsit, terugkyk en vooruitbeplan

Kontak gerus Lizna de Villiers , PSG Wealth adviseur.

In hierdie nuusbrief deel ek ’n paar boekidees vir jou Desember-vakansie, om langs die swembad of op die rusbank te lees, of om as geskenk uit te deel. Ek raak ook aan ’n paar aspekte wat jy in ag moet neem vir jou 2024-beplanning.

Kyk terug na 2023

Dit is belangrik om ’n tydjie af te staan en terug te kyk oor jou finansiële reis vanjaar. Dink aan jou prestasies en terugslae, en kyk na waar jy staan met jou verskillende finansiële doelwitte. As jy jou finansiële status bekyk en nuwe doelwitte vir die komende jaar stel, sal jy beter voorbereid wees om die finansiële uitdagings en geleenthede wat voorlê te hanteer.

Finansiële wenke vir 2024

Hier is ’n paar addisionele wenke om jou te help met die beplanning vir 2024:

• Hersien jou begroting: Die Suid-Afrikaanse ekonomie is onder druk, met hoë inflasiekoerse en hoë rentekoerse wat ons verbruikers se sakke raak. Gebruik die tyd om te besin oor hoe om die nuwe jaar aan te pak.
• Stel duidelike finansiële doelwitte: Stel finansiële doelwitte vir die komende jaar om jou finansiële reis op koers te hou. 2024 kan ’n wisselvallige jaar in die markte wees, wanneer dit belangrik is om verby die geraas te kyk en te hou by jou finansiële plan. ’n Groot deel hiervan is egter om seker te wees dat jou planne vir die kort termyn en medium termyn in plek is, en jou langtermynkapitaal kans te gee om te groei.
• Evalueer jou beleggingsportefeulje: Maak van die geleentheid gebruik om jou beleggingsportefeulje te hersien en seker te maak dat dit ooreenstem met jou doelwitte hierbo, dat jou noodfonds in plek is en dat jy gebruik maak van belastingvoordele. Kyk ook na jou risikodekking, korttermynversekering en testament.

Leesidees vir die vakansie

Ek wil graag ook ’n paar van my leesidees vir hierdie vakansie met julle deel. Hierdie boeke handel oor ’n verskeidenheid onderwerpe en kan help dat ons 2024 met nuwe ywer aanpak.

1.     Produktiwiteit

In Atomic Habits deur James Cleat word daar gewys hoe klein maar konstante veranderings aan jou gewoontes ’n groot impak op jou lewe kan hê.

2.     Kommunikasie

How to talk to anyone deur Leil Lowndes gee praktiese wenke en tegnieke oor gesels, liggaamstaal en effektiewe luister. Die boek poog om lesers te leer om verskeie sosiale situasies te navigeer.

3.     Persoonlike finansies

Psychology of money deur Morgan Housel ondersoek die komplekse en dikwels irrasionele verhouding wat individue met geld het, en die sielkundige faktore wat finansiële beplanning beïnvloed.

4.     Besigheid

In Your Next Five Moves ondersoek Patrick Bet-David strategiese denke, besluitneming en die sielkunde van sukses.

2023 was ’n uitdagende maar ook ’n opwindende jaar. Dankie dat jy my en PSG Wealth Pretoria-Oos met jou finansiële welstand vertrou het. Ek sien uit daarna om 2024 saam met jou aan te pak en jou te help om jou doelwitte te bereik.