'n Betekenisvolle nalatenskap

‘n Betekenisvolle nalatenskap

Die Covid-19 pandemie het ons almal daaraan herinner dat die lewe kosbaar is en dat goeie gesondheid vir niemand gewaarborg is nie. Die meeste van ons het of self ‘n geliefde aan Covid-19 afgestaan, of weet van iemand wat ‘n geliefde verloor het. ‘n Testament is sekerlik die belangrikste regsdokument wat jy in jou leeftyd kan hê. Nie almal verstaan en besef hoe belangrik dit is om ‘n geldige testament in plek te hê nie en dit is juis om hierdie rede dat ‘n groot hoeveelheid Suid-Afrikaners nie ‘n geldige testament het nie. Dit is nie lekker om oor die dood te praat nie, in teendeel, dit is ‘n gesprek wat ons almal liewer wil vermy.

Party mense glo dat ‘n testament onnodig is en al wat hulle moet doen, is om een van hulle geliefdes te vertel wat hulle wense is en wie moet wat erf. Ongelukkig is dit nie so eenvoudig nie. Jou wense word nie vervat in ‘n regsdokument nie en daarom is daar geen waarborg dat jou wense wel uitgevoer gaan word nie. As jy te sterwe sou kom sonder ‘n testament, beteken dit dat jy intestaat sterf en dit kan lei tot onnodige vertragings met die verdeling en allokasie van jou bates, wat jou geliefdes dalk vir ‘n onbepaalde tyd sonder voldoende finansiële sorg kan laat.

Om jou gedagtes oor jou testament aan die gang te kry, dink na oor die volgende:

• Is die datum van ondertekening van jou testament meer as 5 jaar gelede?
• Maak jou bestaande testament voorsiening vir die herroeping van alle vorige testamente?
• Het jy ‘n buitelandse testament wat bepaal wat met jou buitelandse bates gaan gebeur? (bv. buitelandse beleggings)
• Het jy kinders of ander geliefdes wat geëmigreer het?
• Is daar genoeg kontant in jou boedel om alle laste en ander verpligtinge na te kom?
• Het jy voogde vir jou minderjarige kinders genomineer?

Die afsterwe van ‘n geliefde is baie traumaties en kan afhanklikes in ‘n emosionele en finansiële warboel plaas. Moenie die ongemaklike gesprek oor jou nalatenskap uitstel nie.