Wat 2022 vir beleggers inhou, wat om te verwag en waarvoor om uit te kyk

Dit wil voorkom of inflasie hierdie keer langer gaan bly, hoewel sentrale banke onder druk verkeer om seker te maak dat dit nie in ʼn inflasiespiraal ontaard nie. Plaaslik het die Suid-Afrikaanse Reserwebank rentekoerse met 0.5% verhoog sedert dit sy laagste vlak bereik het, en aangedui dat hierdie tendens elke kwartaal vir die volgende twee en ʼn half jaar voortgesit sal word.

Weens hoër insetkosse kan hoë inflasie maatskappywinste onder druk plaas. In sulke omstandighede sal maatskappye moontlik minder mense in diens neem, wat ʼn impak het op lewenspeil. Hoë inflasie het nog altyd met laer opbrengste op aandele gekorreleer.

PSG Wealth gee nog steeds voorkeur aan aandele oor die lang termyn (veral met inagneming van inflasierisiko), maar glo dat beleggers vir hul kontantbehoeftes voorsiening moet maak, sodat hulle nie noodgedwonge in tye van onbestendigheid geld uit hul beleggings moet gebruik nie. PSG Wealth se siening oor markte en bateklasse in die volgende ekonomiese siklus kan soos volg saamgevat word:

• Ons sien ʼn rigtingverandering in internasionale rentekoerse, wat na verwagting sal styg. Hierdie veranderings is nog nie in die markte verdiskonteer nie.
• Stygende rentekoerse sal ʼn negatiewe invloed op Amerikaanse effekte, buitelandse eiendom en aandele hê. Dit is belangrik om in gedagte te hou dat stygende rentekoerse sekere sektore (bv. bankaandele) minder sal affekteer.
• Beleggers moet oor die kort termyn meer markonbestendigheid verwag
• Ontluikende markte (SA inkluis) behoort goed te vaar oor die volgende twee jaar, hoewel ontwikkelinge in China noukeurig dopgehou moet word.
• Beleggingsuitkomste in SA behoort beter te wees as in wêreldmarkte, met inagneming van die lae waardasievlakke in groot dele van die plaaslike mark, asook hoër kommoditeitsprys-dryfvere.

Regerings, en veral die Amerikaanse Federale Reserwe, sal waarskynlik probeer om rentekoerse so laag as moontlik te hou om ekonomiese groei te bevorder. Ons is van mening dat beleggers opbrengste van tussen 9% en 15% per jaar op plaaslike aandele kan verwag oor die volgende 10 jaar. Dit kom neer op inflasie plus 8% op gemiddelde opbrengste.

PSG Wealth se siening is dat buitelandse markte opbrengste van tussen 3% en 6% bo inflasie per jaar sal lewer oor die volgende 10 jaar.

Ten slotte:

In tye van inflasie is dit van kardinale belang dat die koopkrag van kliënte se portefeuljes beskerm word. Met ander woorde, kliënte se portefeuljes moet genoeg groeibates bevat om die impak van hoër inflasie teen te werk. As ʼn verskansingsinstrument teen inflasie, speel risikobates of aandele ʼn uiters waardevolle rol in portefeuljes. Ongelukkig is aandele nie geneig om in ʼn reguit lyn te styg (groei) soos in die geval van kontant nie. Aandele word gekenmerk deur wisselvalligheid, en as beleggers dít kan verstaan, kan die reis van A na B ʼn baie aangenamer ervaring wees.

In die tabelle hieronder lig ons die risiko’s en geleenthede toe soos ons hulle beskou:

Ons wens jou en jou familie ʼn baie goeie en voorspoedige jaar toe. Mag jy goeie gesondheid geniet, en tyd inruim om met geliefdes in aanraking te kom. Wees verseker dat jou beleggings in goeie hande is, en dat ons dit met toewyding en passie namens jou en in jou beste belang bestuur.