Bou welvaart wat jou sal oorleef: Boedelbeplanning vir die moderne Suid-Afrikaanse gesin

Kontak gerus Stefan van Rooyen  direk, PSG Wealth Welvaartbestuurder. 

Algemene leemtes wat boedelbeplanning in Suid-Afrika betref

Baie families begin te laat aan boedelbeplanning dink – dikwels wanneer dit nie meer ʼn proaktiewe gesprek is nie. Hier is ʼn paar foute wat selfs hoë-inkomsteverdieners duur te staan kom:

• Gebrek aan ʼn geldige testament: ’n Testament lê die grondslag vir enige boedelbeplanning. Sonder ʼn testament sal jou bates volgens die Wet op Intestate Erfopvolging verdeel word, wat miskien nie jou wense weerspieël nie.
• Geen beplanning vir likiditeit nie: Wanneer jy te sterwe kom, kan daar administrasiekoste, belasting en skuld wees wat deur jou boedel gedek moet word. By gebrek aan kontantbates sal erfgename dalk noodgedwonge eiendom of beleggings van die hand moet sit.
• Onduidelike opdragte oor voogdyskap: Dit is uiters belangrik dat ouers wettige voogde in hul testament benoem. Daarsonder sal die hof ʼn voog aanstel om na jou kinders om te sien, sonder leiding van jou kant af.
• Verouderde begunstigdebenoemings: Voordele wat deur aftreefondse en lewensversekeringspolisse aan benoemde begunstigdes betaalbaar is, word direk aan die begunstigdes en nie deur die boedel betaal nie – maak dus seker jou begunstigdebenoemings is op datum.

Oor ʼn koppie koffie kan ek ʼn paar onaangename ervarings deel van kliënte wat vir ekstra belasting of eksekuteursgelde moes opdok omdat begunstigdebenoemings nie bygewerk is nie – koste wat met behoorlike beplanning tot die minimum beperk kon word.

Strategiese aanwending van trusts, skenkings en testamente

ʼn Goed gestruktureerde boedelplan behels meer as om net ʼn testament op te stel. Vir meer komplekse boedels of gesinne met minderjarige kinders kan trusts ʼn kragtige hulpmiddel wees:

• Testamentêre trusts word in jou testament opgestel en tree eers na jou dood in werking. Dit kan gebruik word om te verseker dat bates namens kinders bestuur word totdat hulle ʼn geskikte ouderdom bereik. Hierdie trusts help veral om minderjarige kinders of afhanklikes wat nie gereed is om ʼn erfdeel op hul eie te bestuur nie, te beskerm. Jy kan spesifiseer hoe die geld gebruik moet word – vir onderrig, lewenskoste of sekere mylpale – en dit gee jou ʼn mate van beheer oor hoe jou nalatenskap jou geliefdes ondersteun.
• Inter vivos- (lewende) trusts word geskep terwyl jy nog leef. Hierdie trusts stel jou in staat om sekere bates uit jou persoonlike boedel te skuif. Dit kan help om hierdie bates teen krediteure te beskerm, die oordragproses ná afsterwe te vereenvoudig en boedelbelasting te verminder. Sulke trusts word dikwels vir langtermyn-welvaartbewaring gebruik en kan jou familie steeds oor geslagte heen baat.
• Skenkings van bates gedurende jou leeftyd kan help om boedelbelasting te verminder en familiebehoeftes te dek. Skenkings aan jou gade is heeltemal vrygestel van skenkingsbelasting, en bydraes tot ʼn kind se onderhoud kan ook vir vrystellings kwalifiseer – mits hierdie bydraes redelik geag word deur die SA Inkomstediens (SARS). Voorts is die eerste R100 000 per jaar ten opsigte van eiendom wat deur ʼn natuurlike persoon geskenk word, vrygestel van skenkingsbelasting.
• ʼn Testament is die ruggraat van elke opvolgplan. Dit kan saam met trusts gebruik word om jou voornemens duidelik uit te spel, bates doeltreffend te verdeel en familietwis te vermy.

Hoe om boedelbelasting en kapitaalwinsbelasting (KWB) te verminder

Boedelbelasting en kapitaalwinsbelasting kan jou geliefdes se erfenis aansienlik laat krimp, maar met strategiese beplanning kan die impak verminder word:

• Maak gebruik van die boedelbelastingkorting van R3.5 miljoen: Hierdie bedrag is belastingvry en kan vir gades verdubbel word, mits beplanning gekoördineer word.
• Gebruik trusts om bategroei “vas te pen”: Groei binne ʼn trust kan KWB en boedelbelasting oor tyd verminder.
• Maak seker dat jou beleggings belastingdoeltreffend saamgestel is: Aftreefondse (pensioen-, voorsorg-, uittree-annuïteits- en bewaringsfondse) en lewende annuïteite val buite jou boedel en is van boedelbelasting vrygestel (gaan dus jou begunstigdebenoemings na).
• Oorweeg lewensdekking vir likiditeit: Die opbrengs van lewensversekeringspolisse kan help om belasting en fooie te vereffen, sonder om inkomstegewende bates van die hand te moet sit.

Testamente, trusts en gemoedsrus

Boedelbeplanning is nie ʼn eenmalige taak nie – dit is ʼn aktiewe deel van jou finansiële reis. Die doel is nie net om rykdom na te laat nie, maar om dit op oordeelkundige wyse te doen – met doelgerigtheid, duidelikheid en sorgsaamheid. As ʼn gesertifiseerde finansiële beplanner help ek kliënte om boedelplanne te skep wat hul finansiële doelwitte sowel as hul familiewaardes weerspieël.

By Paarl Cecilia Square Stockbroking is ons gereed om die reis saam met jou aan te pak. As jy persoonlike leiding wil hê of vrae het oor testamente, trusts of enige deel van jou boedelplan, kom ons gesels daaroor. Saam kan ons seker maak dat jou welvaart toekomstige geslagte tot voordeel sal wees.