Die voordele van Uittree-annuïteite en Belastingvrye Beleggingsplanne

Kontak gerus Lourens van Wyk  direk, PSG Wealth adviseur.

Uittree-annuïteite: Spaar vandag, betaal minder belasting

ʼn Uittree-annuïteit is spesifiek bedoel om langtermyn-aftreespaarfondse op te bou, en hou beduidende belastingvoordele in.

Bydraes tot ʼn UA is belastingaftrekbaar tot 27.5% van jou belasbare inkomste of vergoeding, tot ʼn maksimum van R350 000 per belastingjaar. Dit kom daarop neer dat SARS jou help om vir aftrede te spaar.

Praktiese voorbeeld:

Gestel jy verdien R600 000 per jaar en dra R100 000 by tot ʼn uittree-annuïteit. Jou belasbare inkomste kan dan afkom tot R500 000. Na gelang van jou belastingkerf, kan jy tienduisende rande aan belasting bespaar vir die jaar, en dis geld wat in jou belegging vir jou toekoms bly, in plaas van om na SARS te gaan.

Binne ʼn UA is groei op jou beleggings belastingvry – daar is geen belasting op rente, dividende of kapitaalwins terwyl die geld in die belegging bly nie. Hierdie belastingvrye groei kan met verloop van tyd ʼn beduidende verskil maak aan jou aftreebedrag.

Nog ʼn belangrike voordeel is dissipline. Aangesien UA’s gewoonlik eers van ouderdom 55 af onttrek kan word (behalwe vir die spaarkomponent indien ’n noodsituasie sou ontstaan), verhoed dit dat jou aftreespaargeld te vroeg gebruik word.

Belastingvrye Beleggingsplanne: Buigsaam en kragtig

Belastingvrye beleggingsplanne bied ʼn ander maar net so waardevolle voordeel. Hoewel bydraes nie belastingaftrekbaar is nie, is alle groei en onttrekkings heeltemal belastingvry – lewenslank.

Jy kan tot R36 000 per jaar bydra, met ʼn leeftydperk van R500 000. Enige bydraes wat jy bo hierdie limiete maak, sal teen 40% belas word.

Praktiese voorbeeld:

As jy R36 000 per jaar in ʼn belastingvrye belegging belê en dit groei teen 10% per jaar, kan die toekomstige waarde na 20 jaar heel moontlik ver oor die R1.3 miljoen wees – en elke sent kan belastingvry onttrek word.

Belastingvrye Spaarrekeninge is baie buigsaam. Aangesien jy enige tyd toegang tot die geld het, is BVSR’e ideaal vir:

• die aanvulling van aftree-inkomste
• langtermyndoelwitte
• befondsing van toekomstige uitgawes sonder om vir belasting aanspreeklik te word.

Wees egter versigtig met onttrekkings, omdat leeftydperke van toepassing is – wanneer jy ʼn bedrag onttrek, kan jy dit nie “vervang” om steeds die belastingvoordeel te kry nie.

Hoekom die tydstip belangrik is: Belê voor die belastingjaareinde

Suid-Afrika se belastingjaar eindig op 28/29 Februarie elke jaar. Bydraes voor hierdie datum tel vir die huidige belastingjaar en kan onmiddellik jou belastingposisie verbeter:

• UA-bydraes wat voor die belastingjaareinde belê word, kan jou volgende belastingrekening verminder of jou terugbetaling verhoog.
• Ongebruikte jaarlikse vergunnings ten opsigte van BVSR’e is vir altyd verlore – as jy nie die R36 000 vanjaar benut nie, kan jy dit nie oordra nie.

As jy tot later wag, beteken dit dikwels verlore geleenthede wat nooit ingehaal kan word nie.

Span albei in

UA’s en BVSR’e werk die beste wanneer hulle saam gebruik word:

• UA’s bied onmiddellike belastingverligting en langtermyn-aftreesekuriteit.
• BVSR’e bied belastingvrye buigsaamheid en toekomstige inkomste sonder belastingimplikasies.

Deur gereeld tot albei by te dra – en hulle voor die belastingjaareinde aan te vul – gee jy jouself die beste kans om op doeltreffende en volhoubare wyse welvaart op te bou.

Kortom – begin vroeg, dra gereeld by, en moenie tot op die nippertjie wag nie. Die besluite wat jy voor die einde van hierdie belastingjaar neem, kan ʼn blywende invloed op jou finansiële toekoms hê.