Hoe kan ’n Suid-Afrikaanse trust geld in die buiteland belê?

Kontak gerus Adri Hörstmann  direk, PSG Wealth adviseur.

Individue kan direk in ’n buitelandse belegging belê. Daarbenewens kan ’n Suid-Afrikaanse trust en individue ook geld in die buiteland belê deur middel van ’n bateruilbelegging of voerdereffektetrustfonds (“feeder”).

Wat is ’n bateruilbelegging?

’n Bateruilbelegging is ’n rand-gedomineerde belegging wat geruil word vir buitelandse geldeenhede en in die buiteland belê word. Beleggers kan toegang verkry tot ’n bateruilbelegging deur middel van ’n voerdereffektetrustfonds wat direk in ’n buitelandse fonds belê.

Bateruilbeleggings is ideaal vir beleggers wat nie hul bates direk in die buiteland wil belê nie, maar nog steeds die voordeel van buitelandse markblootstelling wil geniet.

Beleggers kan in buitelandse markte en bates belê deur gebruik te maak van Suid-Afrikaanse rand, sonder om gebruik te maak van hul persoonlike buitelandse beleggingstoelaag.

Die voordele van ’n bateruilbelegging

Valutabeheervoordeel

• Suid-Afrikaanse individue kan jaarliks R1 miljoen deur middel van ’n enkel- diskresionêre toelaag (sonder Reserwebank-belastinguitklaring) en R10 miljoen deur middel van ’n buitelandsebeleggingstoelaag (met Reserwebank-goedkeuring) in die buiteland belê. Hierdie perke is nie op ‘n bateruilbelegging van toepassing nie.
• Suid-Afrikaanse individue wat dus reeds hulle buitelandse toelaag van R11 miljoen gebruik het, kan addisionele buitelandse blootstelling kry sonder die Reserwebank se belastinguitklaring.
• Geen belastinguitklaring hoef verkry te word nie omdat die beleggingsplatform se buitelandse toelaag gebruik word, wat reeds deur die Reserwebank goedgekeur is, en nie die trust of individu se eie buitelandse toelaag nie.
• Suid-Afrikaanse trusts kan nie direk in die buiteland belê nie, maar kan met ’n bateruiltransaksie steeds buitelandse blootstelling kry.

Rand-depresiasievoordeel

• Beleggers deel in die opbrengste wat die fondsbestuurders genereer en kry die voordeel wanneer die rand teenoor buitelandse geldeenhede depresieer.

Mag kleiner bedrae belê

• Die minimum lompsom bedrag van R100 000 of R1 000 per maand herhalende bydrae wat belê mag word, is heelwat minder as wat die meeste platforms vir direkte belegging in die buiteland vereis. Beleggers kan maandelikse bydraes maak en op hierdie manier buitelandse blootstelling kry.

Ander entiteite

• Maatskappye, institusionele beleggers en Suid-Afrikaanse trusts kan sonder Resewebank-belastinguitklaring geld in die buiteland belê.
• Minderjariges, wat as gevolg van valutaregulasies nie direk in die buiteland mag belê nie, mag deur middel van ’n bateruilbelegging geld in die buiteland belê.

Diversifikasie

• Laat beleggers toe om hulle beleggingsportefeuljes oor internasionale markte en geldeenhede te diversifiseer en hulle blootstelling aan die plaaslike Suid-Afrikaanse mark te verminder.

Hoe kry ’n belegger toegang tot ’n bateruilfonds?

Al die groot batebestuurders in Suid Afrika het bateruil-voerdereffektetrustfondse op hulle platforms beskikbaar. Plaaslike fondsbestuurders belê in buitelandse bates volgens die voerdereffektetrustfonds se mandaat. Elke belegger kan ’n bateruilbelegging oorweeg wat met die belegger se finansiële doelwitte en risiko-aptyt ooreenstem.

Voornemende beleggers moet ook in gedagte hou dat beleggings direk in die buiteland gemaak kan word, wat addisionele reëls en belastinggevolge soos situsbelasting en testamentêre oorwegings tot gevolg het. Vir meer inligting oor hoe om in die buiteland te belê, kontak gerus vir Adri Hörstmann om jou met raad by te staan.