“Een gewoontetjie wat gesorg het vir die helfte van my aftreespaargeld”

Kontak gerus  Lorika Steyn   direk, PSG Wealth adviseur.

Wanneer moet jy vir aftrede begin spaar?

Kom ons gaan terug na 1999: ek het pas my eerste werk gekry as ʼn leerlingteller by ʼn bank. My maandelikse salaris? ʼn Hele R1 500. Dit was nie baie nie, maar vir my was dit wonderlik. Soos baie ander jong volwassenes, het ek net probeer om kop bo water te hou – huur te betaal, ietsie saam met vriende te eet, en af en toe ʼn aand uit te geniet. Aftrede? Dit was nie eens op my radar nie.

Hier is egter die goue reël wat ek wens iemand het destyds aan my verduidelik:

Begin spaar 15% van jou voorbelaste inkomste uit jou heel eerste salaris.

Doen dit selfs wanneer jy voel jy kan skaars uitkom met jou geld.

Feit is egter: oor 40 jaar kan daardie gewoonte om gereeld te spaar jou ʼn aftreebedrag gee wat groot genoeg is om tot 75% van jou inkomste by aftrede te vervang. En weet jy wat die dryfveer vir hierdie ongelooflike groei is?

Saamgestelde rente

Hier is ʼn verstommende feit:

Die eerste 10 jaar wat jy spaar, sal vir tot 50% van jou totale aftreevoordeel sorg.

Ja, die helfte van jou aftree-inkomste kan te danke wees aan daardie klein bedraggies wat jy in jou 20’s en vroeë 30’s gespaar het.

En aan die ander kant? Indien jy eers in jou 30’s of 40’s vir aftrede begin spaar, sal jy nie net ʼn paar jaar verloor nie – jy sal moontlik jou aftreevoordeel halveer. Of jy sal nog ʼn ekstra 10 jaar moet werk om die verlore tyd in te haal.

Hier is ʼn goeie voorbeeld wat twee spaarders vergelyk, en illustreer watter verskil dit maak om vroeg te begin en jou spaarbedrag geleidelik te verhoog, in plaas van later te begin met hoër aanvanklike bydraes:

Voorbeeld: Spaar vanaf ouderdom 25 vs begin op ouderdom 40

Geraamde uitkomste:

•   Anja se totale aftreefonds op 65: Sowat R11 miljoen

•   Carol se totale aftreefonds op 65: Sowat R4.7 miljoen

Wat dit wys:

•   Hoewel Carol twee keer soveel per maand bydra, beteken die feit dat sy 15 jaar later begin dat sy minder as die helfte van Anja se spaargeld opbou.

•   Deur vroeg te begin belê, kon Anja haar geld langer laat groei, en voordeel trek uit saamgestelde rente en die geleidelike bydraeverhogings.

•   Anja se gewoonte om bydraes jaarliks met 5% te verhoog, beteken ook dat haar spaargeld tred hou met inflasie en inkomstegroei, met groter spaardoeltreffendheid oor die lang termyn.

Belangrikste les:

Deur vroeg te begin en by hoër beleggingsopbrengste baat te vind, kan jy jou aftreespaargeld beduidend verhoog, selfs al is die aanvanklike bydraes kleiner. Die krag van tyd, tesame met ʼn sterk groeikoers en gereelde bydraeverhogings, is die doeltreffendste manier om ʼn stewige aftreefonds op te bou.

So, ongeag of jy R10 000 of R100 000 verdien, die les is dieselfde:

Begin nou. Hou aan belê. Laat tyd en rente die hardste werk.

Dit gaan nie oor hoeveel jy verdien nie. Dit gaan oor hoe vroeg – en hoe gereeld – jy begin belê.

Jou toekomstige self sal jou ewig dankbaar wees.