Werknemervoordele: ʼn Besigheidsbelegging, nie ʼn uitgawe nie

Kontak gerus Juanita Myburgh   direk, PSG Wealth adviseur.

In die mededingende arbeidsmark is werknemervoordele deesdae nie meer net ʼn luukse nie, maar ʼn strategiese noodsaaklikheid. Talentvolle professionele persone takseer werkgewers nie meer net volgens die potensiële salaris wat hulle kan kry nie, maar in toenemende mate ook volgens die totale voordeelpakket wat die maatskappy aanbied – en dit sluit gesondheidsorg, aftreebydraes, welstandprogramme, groeprisikodekking, en nog meer in.

Werknemervoordele word dikwels verkeerd verstaan en bloot as ʼn kostesentrum beskou. Wanneer hierdie voordele egter goed gestruktureer is, beskerm hulle jou besigheid, ondersteun jou span, en versterk jou handelsmerk as werkgewer.

Voordele verhoog behoud en produktiwiteit 

Studies toon dat maatskappye wat omvattende voordele aanbied, tot 30% meer personeellede behou en tot 20% hoër produktiwiteit behaal. Wanneer werknemers veilig voel oor hul toekoms, is hulle meer gefokus en toegewyd in hul werk.

Hoekom dit saak maak

• Behoud = laer werwingskoste
  Die vervanging van ʼn ervare werknemer kan tot 6 – 9 maande se salaris kos. ʼn Goed gestruktureerde voordeelpakket bevorder lojaliteit en verminder hierdie verskuilde koste.
• Sakekontinuïteit deur groeprisikodekking
  Indien ʼn werknemer arbeidsongeskik raak of onverwags sterf, sal die regte soort dekking verhoed dat jou besigheid ʼn finansiële terugslag kry. Groeplewensdekking, ongeskiktheids- en inkomstebeskerming is nie net vir personeel bedoel nie – dit bied beskerming vir jou maatskappy se werksaamhede.
• Aftreebeplanning
  Baie werknemers staar uitdagings in die gesig om voldoende vir hul pensioen te spaar. Gestruktureerde bydraes, ondersteun deur belastingvoordele, kan langtermyn finansiële sekuriteit verbeter.
• Belastingvoordele
  Baie bydraes tot aftreefondse en risikovoordele is belastingaftrekbaar, en daarom ʼn slim toewysing van maatskappyfondse.

 Voordele vir die werkgewer

Aftree- en versekeringsvoordele speel ʼn al hoe belangriker rol in die lewe van werknemers en hul gesinne, en het ʼn beduidende finansiële en administratiewe impak op ʼn besigheid. Voordele vir die werkgewer sluit in:

• Belastingaftrekbaarheid van werkgewerbydraes tot die aftreefonds (tot 20% van die betaalstaat, ten opsigte van bydraes tot ʼn aftreefonds of mediese fonds).
• Help werknemers met dissipline om vir aftrede te spaar.
• Vermoë om kostedoeltreffende versekeringsvoordele aan alle werknemers te verskaf, teen laer tariewe as wat werknemers in hul persoonlike hoedanigheid sou kon kry.
• Uitskakeling van die dilemma van korporatiewe “morele verantwoordelikheid” wanneer ʼn werknemer aftree, sterf of arbeidsongeskik raak.
• Moontlike beperking van verpligte deelname aan die toekomstige nasionale maatskaplike welsynskema.

Voordele vir die werknemer

Minder as 10% van die werkende bevolking in Suid-Afrika het vandag genoeg geld by aftrede om hul bestaande lewenstandaard voort te sit. Aftreefondse is nodig, en dit is net so nodig vir werknemers om hul voordele te bewaar indien hulle van werkgewer verander. Voordele vir werknemers sluit in:

• Werkgewerbydraes word as ʼn byvoordeel in die hande van die lid (werknemer) belas.
• Belastingaftrekbaarheid van werknemerbydraes tot die aftreefonds (tot 27,5% van totale vergoeding, beperk tot R350 000 per belastingjaar).
• Versekeringsvoordele wat finansiële sekuriteit aan werknemers en hul gesinne verskaf, teen bekostigbare tariewe wat laer is as dié op individuele voordele wat deur die werknemer uitgeneem word.
• Versekeringsdekking sonder mediese onderskrywing tot die bewysvrye perk vir voordele. Rookstatus en gevaarlike stokperdjies word ook nie in die geval van groepdekking in aanmerking geneem nie.
• Lede het eers by aftrede toegang tot die geld, maar kan een keer per belastingjaar ʼn onttrekking aangaan in geval van nood, danksy die tweepot-stelsel.
• Toegang tot ʼn wye reeks kostedoeltreffende beleggingsportefeuljes.
• Aftreefondse maak nie deel uit van ʼn lid se boedel nie en is dus van boedelbelasting en eksekuteursgelde vrygestel.

Suid-Afrikaanse wetgewing met betrekking tot werknemervoordele ontwikkel deurentyd. Die tweepot-aftreestelsel wat onlangs in werking gestel is, het implikasies vir hoe voordele gestruktureer en aan werknemers gekommunikeer word.

Werkgewers word aangemoedig om periodiek hul voordele-strukture te hersien om te verseker dat dit voldoen aan regulasies, koste-effektief is, en in lyn is met werknemers se behoeftes.