Kunsmatige intelligensie in ‘n veranderende beleggingswêreld

Kontak gerus Dawie Klopper, PSG Wealth adviseur.

Die makro-omgewing is die afgelope jaar gekenmerk deur:

• Hardnekkige inflasie en hoë rentekoerse.
• Die voortslepende oorlog in Oekraïne...
• ... en die konflik tussen Hamas en Israel, wat onlangs onverwags ’n oorlog ontketen het wat die wêreldorde kan beïnvloed – iets wat kan gebeur as die oorlog uitbrei en ’n land soos Iran betrokke raak.
• Kommoditeits- en die meeste landboupryse het egter gedaal, ten spyte van hierdie geopolitiese onsekerheid wat die wêreld getref het.
• Die Amerikaanse Federale Reserweraad (die Fed) en ander sentrale banke handhaaf steeds hoë rentekoerse om inflasieverwagtinge af te bestuur. Die gesaghebbende tydskrif Economist het êrens verlede jaar ’n voorbladartikel geskryf oor die Fed wat geloofwaardigheid verloor het, welke kritiek beleidmakers aldaar hard getref het.
• Die VSA se opbrengskromme (korttermyn-rentekoerse minus langtermyn-rentekoerse) is steeds omgekeerd... en dit kan, soos in die verlede, op ’n resessie in die VSA dui.
• China sukkel om sy ekonomie aan die groei te kry en as Suid-Afrikaanse beleggers sien ons dit in die ietwat sukkelende vertoning van Naspers/Prosus via Tencent, en Richemont.
• In Suid-Afrika gaan dit oor die verval van infrastruktuur (dink Eskom, Transnet en cholera), en die feit dat ons sogenaamd geopolities onverbonde is – alles omgewingsfaktore wat dit moeilik maak vir Suid-Afrikaanse maatskappye om te presteer.
• Werkloosheid in Suid-Afrika is steeds skandalig hoog, en dít veral omrede die ekonomie nie vinnig groei om werk te skep nie.
• Die fokus in die land is ook besig om na volgende jaar se verkiesing te verskuif... maar koalisievorming is uiters frustrerend en tans lyk dit nie of daar genoeg momentum gaan wees om die ANC uit die kussings te lig nie.
• Die rand is swak, selfs na die onlangse matige versterking, maar dit is net belangrik om te onthou dat veral die beweging van kommoditeitspryse ’n impak op die rand het. Tans is kommoditeitspryse swak en gevolglik is die rand ook swak. Ander faktore soos beurtkrag en ons regering se vreemde buitelandse beleid dra ook by tot die rand se gesukkel.
• In die tussentyd is Amerikaanse markte tot onlangs nog deur kunsmatige intelligensie-ontwikkelinge ondersteun (sewe groot tegnologiemaatskappye), maar daardie mark is ook nou onder matige druk (5% laer sedert Julie 2023).
• In Suid-Afrika het die JSE se Algehele Indeks vroeg in 2023 tot 80324 punte gestyg, maar vanweë ’n aantal gebeure onlangs teruggesak. Die indeks staan nou op 71886, wat 10% laer is.
• Die gevolg van al hierdie gebeure is dat VSA-aandele tans reg geprys is en dat die JSE se Algehele Indeks (met ’n rede) baie goedkoop is.