Monetisering van kunsmatige intelligensie

Kontak gerus  Franske Neiteler direk, PSG Wealth adviseur.

Met generatiewe kunsmatige intelligensie (GenAI) as die algemeenste voorbeeld van KI, kan dit vir maatskappye die geleentheid van die toekoms wees om hul nuut geskepte vermoëns te monetiseer. Generatiewe KI word opgelei in groot hoeveelhede data om verhoudinge en patrone te ontwikkel wat dit in staat stel om te leer en uitsette in die vorm van teks, beelde, video’s, kodes en nog baie meer te lewer. Dit stel rekenaars in staat om voort te bou op menslike vermoëns om inligting te genereer en inhoud te skep. ʼn Eenvoudige voorbeeld hiervan is die vermoë van ʼn generatiewe KI-model om ʼn liedjie of video te skep wat suiwer gebaseer is op tekstoevoer wat dit na ʼn sekere tema of teks lei.

Figuur 1: Generatiewe KI-insette en -uitsette

Bron: Nvidia-voorlegging aan beleggers

Volgens Bloomberg sal generatiewe KI teen die jaar 2032 inkomste van tot VS$1.3 triljoen (10-12% van totale tegnologiebesteding) kan genereer – in apparatuur, programmatuur, dienste, advertensies, speletjies en nog meer – namate besighede hul werksaamhede transformeer en produkte en dienste uitbrei.

Figuur 2: Besteding aan generatiewe KI

Bronne: Bloomberg Intelligence, IDC, eMarketer, Statista

PwC se onlangse studie oor kunsmatige intelligensie in die wêreld meld verskeie sleuteltoepassings vir die gebruik van generatiewe kunsmatige intelligensie wat ons daaglikse lewe kan transformeer. Ons vestig net die aandag op ʼn paar van die mees algemeen aanvaarde voorbeelde hieronder:

1. Gesondheidsorg
• Stawing van diagnoses op gebiede soos die opsporing van klein afwykings van die basislyn in pasiënte se gesondheidsdata
• Vroeë identifisering van moontlike pandemies
2. Motorvoertuie
• Selfbesturende vlootvoertuie vir gedeelde ritte
• Enjinmonitering en voorspellende selfinstandhouding
3. Finansiële dienste
• Verpersoonlikte finansiële beplanning
• Opsporing van bedrog en bestryding van geldwassery
4. Klein­handel
• Verpersoonlikte ontwerp en produksie
• Voorspelling van klante se vraag – kleinhandelaars begin byvoorbeeld diepleer-modelle gebruik om vooraf klante se bestellings te voorspel
• Voorraad- en afleweringsbestuur
5. Media
• Media-argivering en soektogte
• Klantgerigte inhoudskepping (bemarking, film, musiek, ens.)
• Verpersoonlikte bemarking en reklame
6. Vervaardiging
• Uitgebreide monitering en outomatiese regstelling van vervaardigingsprosesse
•  Voorraadketting- en produksie-optimering
7. Energie
• Slim meting – intydse inligting oor energiegebruik, wat help om rekeninge te verlaag
• Meer doeltreffende netwerkfunksionering en energiebewaring
• Voorspellende infrastruktuur-instandhouding
8. Vervoer en logistiek
• Selfbesturende vragmotorvervoer en aflewering
• Reëling van verkeer en minder opeenhoping

Bloomberg Intelligence het markdata versamel om te bepaal watter van hierdie kategorieë moontlik die hoogste groeikoers kan toon vir die 9-jaartydperk tussen 2023 en 2032. Soos aangedui in Figuur 3, is dit duidelik dat die grootste mark sedert 2023 die wolk- en datastoorinfrastruktuurmark is, terwyl die sogenaamde “hyperscalers” hul vermoëns uitbrei om massiewe generatiewe KI-werkladings te hanteer. Hoewel daar nog steeds gereken word dat infrastruktuur teen 2032 die grootste mark sal wees volgens inkomste, is daar verskeie ander segmente wat ook hoër groei sal toon, aangesien generatiewe KI maatskappye in staat stel om wins te verhoog deur groter doeltreffendheid by hul sakemodelle te voeg. Onder die sektore met die hoogste groeipotensiaal tel uitvindingsprogrammatuur vir geneesmiddels, KI-gebaseerde kubersekuriteitbesteding, verkoop van virtuele goedere en programmatuur vir die ontwerp van speletjies. Die volgende groeifase in die generatiewe KI-mark sal deur hierdie subsektore gedryf moet word, omdat farmaseutiese maatskappye, programmatuur-ontwerpers en kubersekuriteitmaatskappye (om net ʼn paar te noem) hierdie nuutgevonde tegnologie aanwend om hul sakemodelle te optimeer, wat uiteindelik tot hoër winsmarges en groter winsgewendheid lei.

Figuur 3: Inkomstepotensiaal van generatiewe KI

Bronne: Bloomberg Intelligence, IDC, eMarketer, Statista

Winsgewendheid blyk duidelik uit die resultate van die KI-infrastruktuurverskaffers oor die afgelope paar kwartale. Soos met alle vorige tegnologie- of industriële revolusies, sal die tyd leer hoe volhoubaar ʼn nuutgevonde tegnologie is en watter sektore uiteindelik die meeste daarby baat sal vind oor die lang termyn. Een ding is seker: kunsmatige intelligensie sal uiteindelik die wyse verander waarop ons ons vrye tyd deurbring, asook hoe besighede in die toekoms bedryf gaan word, en sommige van bogenoemde sektore sal waarskynlik die volgende wenners wees in die wedloop om uiteindelik kunsmatige intelligensie te monetiseer.