28
March 2024
Meta Platforms
Chris Wehmeyer CFP®
PSG Wealth
Ek het aan die Oos-Rand grootgeword en ek onthou nog hoe my pa elke aand die koerant, The Star, huis toe gebring het. In daardie dae was ʼn koerant die hoofbron van nuus en advertensies. En niks het my groter plesier gegee as om die koerant elke dag van voor tot agter deur te lees nie. Ek het die advertensies deeglik bestudeer, want my hartsbegeerte was om ʼn Alfa Romeo Guilia te koop, wat toe sowat R650 gekos het. As jong seun kon ek maar net droom van so ʼn motor.
Kontak gerus Chris Wehmeyer direk, PSG Wealth adviseur.
Mense koop die koerant vir die nuus, sport en markte, maar ek dink die belangrikste rede is vir die advertensies. Vandag is advertensies in die naweekkoerante beperk tot die groot supermarkte en drankwinkels. In sy fleur was Pretoria News se sirkulasie 40 000 eksemplare per dag. Dit het gekrimp tot minder as 1 000 in 2022, voordat die druk daarvan gestaak is.
Die rede is dat die wêreld al hoe meer digitaal geraak het, en nuus en bemarking word via digitale platforms soos Facebook, Instagram en Google bedryf.
Meta is die beheermaatskappy van Facebook, Instagram, Facebook Messenger en WhatsApp. Facebook is in 2004 in ʼn koshuis by Harvard Universiteit geloods met die doel om 500 studente met mekaar te laat skakel. Sedertdien het dit die wyse waarop mense met mekaar skakel, verander. Apps (toepassings) soos Messenger, Instagram en WhatsApp het verder miljoene der miljoene mense regoor die wêreld bemagtig. Hulle het ook Reality Labs, wat in die sogenaamde metaversum belê. Dit is ʼn verliesmakende onderneming maar bied eksponensiële groeigeleenthede in die toekoms.
Meta bied robuuste teikenopsies en stel adverteerders in staat om hul ideale klante te bereik op grond van ligging, belangstellings, gedrag en nog meer. Dit is omdat hul algoritmes agterkom wat jou belangstellings en koopbehoeftes is. Hierdie vlak van datadetail is ongeëwenaard in die digitale advertensieruimte. Hulle sal byvoorbeeld jou laaste R500 neem om aan ʼn gefokusde groep in jou voorstad te adverteer.
Sleutelstatistieke van Meta:
- Altesaam 3.96 miljard maandelikse aktiewe gebruikers (monthly active people oftewel MAP’s) gebruik produkte wat deur Facebook besit word, soos Instagram, WhatsApp en Messenger.
- As ʼn selfstandige platform kry Facebook 3.05 miljard maandelikse aktiewe gebruikers, van wie sommige rekeninge op ander produkte in die groep kan hê.
- As ʼn selfstandige platform kry WhatsApp 2 miljard maandelikse aktiewe gebruikers, van wie sommige rekeninge op ander produkte in die groep kan hê.
- As ʼn selfstandige platform kry Instagram meer as 2 miljard maandelikse aktiewe gebruikers, van wie sommige rekeninge op ander produkte in die groep kan hê.
- Die laaste kwartaal tot einde Desember 2024 se beleggersverslag toon op ʼn jaar-tot-jaar-grondslag ʼn toename van 6.74% in maandelikse aktiewe gebruikers.
In die vierde kwartaal van 2023 het Meta inkomste van VS$40.1mjd gegenereer. Dit is 25% hoër danksy die hoogste inkomste nóg in al die bedryfsafdelings. En 97% van die inkomste was afkomstig van advertensies. Die maatskappy se netto inkomste het meer as verdriedubbel tot $14.02mjd, of $5.33 per verwaterde aandeel. Die groep het vrye kontantvloei van $11.5mjd gegenereer – meer as dubbeld die vorige jaar se syfer. Netto kontant het teen einde Desember $47.0mjd bedra.
Meta het sy eerste kwartaallikse dividend van $0.50 per aandeel aangekondig. Die groep “beoog om voortaan ʼn kontantdividend op ʼn kwartaalgrondslag te betaal”.
Prys | $509 |
Markkapitalisasie | $1,3 T |
P/V | 29.55 |
1-jaarprestasie | 171.7% |
Meta bly baie aantreklik gewaardeer, met inagneming van sy groeivooruitsigte. Ons reken dat die maatskappy verwagtings vir 2024 sal oortref en steeds opbrengste sal lewer wat – selfs vanaf huidige vlakke – die mark sal oortref.
Stay Informed
Sign up for our newsletters and receive information on finance.
