Wat misdaad vir SA versekeringsverbruikers beteken en hoe om jou bates te beskerm

Wat misdaad vir SA versekeringsverbruikers beteken en hoe om jou bates te beskerm

Die jongste statistieke wat deur die Suid-Afrikaanse Polisiediens vrygestel is, toon merkbare afnames in sekere tipes misdade. Hoewel hierdie bevindings ʼn bemoedigende prentjie skets, is misdade soos huisinbrake aan die toeneem. Pogings van die Minister van Polisie om “meer stewels op die grond te plaas” is ʼn welkome stap in die stryd teen misdaad, maar daar is baie wat Suid-Afrikaners kan doen om hul eie bates in ʼn omgewing van hoë misdaad te beveilig.

Motordiefstal: hoe om jou voertuig te beskerm

Beskikbare data dui daarop dat voertuie met sleutellose toegangstelsels nou ʼn algemene teiken word vir misdadigers. Hierdie funksie stel bestuurders in staat om hul voertuig sonder ʼn sleutel oop te sluit, met behulp van tegnologie wat op kortafstand-radioseine staatmaak wat deurentyd die omgewing skandeer om agter te kom wanneer die bestuurder binne reikafstand is. Hoewel dit nog nuwe, groter gerief vir bestuurders beteken, is sleutellose tegnologiestelsels egter veral kwesbaar vir afstandbeheerde diefstal.

Verskeie voertuie is as algemene teikens vir hierdie tipe misdaad geïdentifiseer. Om die toename in verliese op hierdie luukse voertuie teen te werk, vereis sommige versekeraars dat motoriste twee opsporingstelsels installeer as ʼn veiligheidsmaatreël. In hierdie gevalle moet bestuurders seker maak dat hul opsporingstelsels te alle tye ten volle in werking is, om te verhoed dat hul eise afgewys word indien iets onverwags gebeur.

Nog ʼn goeie praktyk vir bestuurders is om hul sleutelhouer so ver as moontlik weg van hul voertuig te hou. Dit word ook sterk aanbeveel dat die sleutelhouer in ʼn Faraday-sakkie gebêre word, wat alle eksterne seine blokkeer. Bestuurders word ook aangeraai om seker te maak dat hulle nie artikels op die agterste sitplek los of waar dit enigsins sigbaar is terwyl hul voertuig geparkeer of stilstaande is nie. Bestuurders moet oor die algemeen waaksaam bly en hul omgewing dophou by verkeersligte of wanneer hulle êrens stop.

Saam met hierdie maatreëls om risiko te verminder, kan bestuurders ook omvattende motorversekeringspolisse aangaan. Sommige versekeraars maak voorsiening vir bykomende voordele soos traumaberading en persoonlike ongevalleversekering.

Hoe om jou eiendom veilig te hou

Volgens die jongste statistieke het inbrake by residensiële eiendomme met net meer as 6% toegeneem, met 5 578 sake wat in die eerste kwartaal van 2023 aangemeld is. Die voortslepende elektrisiteitskrisis beteken misdadigers kan tydens kragonderbrekings die kans gebruik om op kwesbare huishoudings toe te slaan. Versekeraars het die afgelope jaar ʼn toename in eise vir residensiële inbrake ondervind.

Daarom is dit nodig dat huiseienaars en eienaars van kommersiële eiendomme ekstra moeite doen om te verseker dat veiligheidstelsels behoorlik werk. Die alarm moet geaktiveer word voordat die eiendom verlaat word. En vir ekstra beskerming kan veiligheidsmaatreëls soos die installering van hangslotte, diefwering en slotgrendels baie help om inbrake te voorkom.

Waar eiendomme deur elektriese heinings beskerm word, is dit ook belangrik om seker te maak dat die reserwebatterye waarop hierdie stelsels loop, genoeg reserwekrag het om so ʼn stelsel vir minstens vier uur aan die gang te hou in die geval van ʼn kragonderbreking. Die gebruik van LED-ligstelsels en sonkragligte op die buitegrens van die eiendom, asook in enige buitelug-areas, word ook aanbeveel.

Sonkrag- of battery-gedrewe flitse moet op verskillende plekke op die eiendom gehou word waar hulle maklik gekry kan word, en maak seker jy het ʼn ekstra stel batterye byderhand. Dit is ook uiters belangrik om te sorg dat jou selfoon altyd vol gelaai is, veral in ʼn noodgeval. En, as die hek van jou eiendom met die hand oop- of toegemaak moet word, kan jy jou sekuriteitsmaatskappy vra dat ʼn wag jou vergesel wanneer jy in stiller tye die eiendom binnegaan of dit verlaat.

In ʼn omgewing waar hoë misdaad voorkom, gebruik versekeringsonderskrywers strenger kriteria vir polisse om uitermatige verliese te voorkom. Daarom is dit belangrik dat Suid-Afrikaanse verbruikers seker maak dat hulle alle bepalings wat by hul polisse ingesluit is, verstaan en dat hulle ook ʼn goeie begrip het van hul eie verantwoordelikhede om hul bates veilig te hou.