Hoe Besighede Hulself Teen Bedrog Kan Beskerm

Hoe besighede hulself teen bedrog kan beskerm

Suid-Afrika se onstuimige ekonomiese klimaat het plaaslike besighede se blootstelling aan verskeie beduidende risiko’s verhoog. Van hierdie risiko’s hou spesifiek verband met bedrog. Die twee algemeenste risiko’s is bedrieglike aktiwiteite of diefstal wat deur werknemers gepleeg word, en die groot risiko van kubermisdaad. Om ʼn besigheid teen die finansiële impak en reputasieskade te beskerm wat dikwels met hierdie insidente gepaardgaan, verg voorkomende maatreëls regdeur die maatskappy, asook die regte versekeringsdekking.

Kyk na agtergrond en nog meer

Daar is ʼn aantal voorsorgmaatreëls wat besigheidseienaars kan tref om hul werksaamhede teen werknemerbedrog te beskerm. Dit is nie net uit die oogpunt van interne risikobestuur en die beperking van risiko belangrik nie – dit kan ook deel uitmaak van die vereistes wat versekeraars stel om die voorwaardes van versekeringspolisse na te kom.

Die voorkoming van werknemerbedrog moet uit die staanspoor by die indiensnemingsproses begin. Besighede moet minstens alle kandidate se agtergrond nagaan en seker maak dat hulle nie ʼn kriminele rekord het nie. Deur aansoekers se verwysings te kontak en kontroleringsondersoeke te doen, kan besighede inligting omtrent die werknemer se vorige werkgeskiedenis asook hul professionele agtergrond en kwalifikasies verifieer.

Die implementering van veiligheidsmaatreëls om toegang tot sensitiewe inligting en finansiële data te beperk, is nog ʼn prosedure wat besighede kan volg om die getal werknemers te beperk wat magtiging het om belangrike transaksies te verwerk en kontantvloei te beheer.

Dit is ook in baie industrieë vir maatskappye beste praktyk om gereelde of jaarlikse oudits deur ʼn buitefirma te laat doen, om die integriteit van die besigheid se finansiële prosesse te verseker. ʼn Anonieme platform vir die aanmelding van bedrog of wangedrag kan ook baie help om ʼn maatskappykultuur van kollektiewe deursigtigheid en verantwoordelikheid te kweek.

Besighede moet ook beplanning vir gebeurlikhede proaktief benader. Byvoorbeeld, na gelang van die industrie, sal ʼn bestaande plan ten opsigte van openbare betrekkinge en krisiskommunikasie wat in werking kan tree wanneer sekere probleme ontstaan, verseker dat die besigheid voorbereid is en onmiddellik stappe kan doen om reputasieskade oor die lang termyn te vermy indien ʼn voorval van bedrog voorkom.

Getrouheidsdekking om jou besigheid teen bedrog te beskerm

Hierdie interne risikobestuurstrategieë kan ondersteun word deur die regte soort versekering uit te neem. Getrouheidsdekking, wat as ʼn afdeling by ʼn kommersiële polis ingesluit kan word, bied die beste beskerming teen bedrog en diefstal deur werknemers. Hierdie soort dekking is spesifiek bedoel om besighede teen verliese voortspruitend uit werknemers se oneerlikheid, enige ongeoorloofde finansiële wins, of verlies van eiendom te beskerm.

Hou koers deur die digitale mynveld

Afgesien van direkte voorvalle van bedrog en diefstal, het besighede ook beskerming nodig teen die potensieel vernietigende uitwerking van kubermisdaad. Volgens die jongste data het kubermisdaad oor die afgelope drie jaar met 191% toegeneem, terwyl die gemiddelde eiskoste met 213% gestyg het. Hierdie statistieke toon hoe wydverspreid die skade is wat veroorsaak kan word wanneer ʼn besigheid se databasis binnegedring, sensitiewe data gesteel of ʼn maatskappy afgedreig word.

Verskeie strategieë kan gevolg word om hierdie tipes risiko’s af te weer. Een van hierdie maatreëls is die implementering van ʼn robuuste verifiëringstelsel wat met die gebruik van multifaktor-verifiëring en komplekse wagwoorde versterk word. Hierdie eerste “verdedigingslyn” kan as ʼn versperring dien om ongemagtigde toegang te verhoed.

Besighede moet ook op en wakker wees met die bywerking van hul programme en produkte, en swakplekke in hul sekuriteit uitskakel. Gelukkig het die ontplooiing van antivirus-oplossings aansienlik meer kostedoeltreffend geword. Baie van hierdie sagteware wat as ʼn diens aangebied word, is toegerus met kunsmatige intelligensie- en gedragopsporingsvermoëns.

Strategiese beskerming teen kubermisdaad

Kuberversekering dien dan as ʼn bykomende vlak van beskerming. Omvattende kuberversekering sal enige nagevolge van ʼn sekuriteitskending dek. Die polis kan so gestruktureer word dat dit eersteparty-dekking, met finansiële beskerming vir die besigheid, sowel as derdeparty-dekking insluit. Laasgenoemde dek die impak op die besigheid se kliëntebasis – dit sluit belanghebbendes en ander persone of organisasies in wat deur die skending geraak is. In gevalle van bedrog, oneerlikheid van werknemers, diefstal en kubermisdaad, speel adviseurs ʼn onmisbare rol om aan besighede leiding te gee oor hoe om hul polisse by hul sakemodel en begroting aan te pas.